ബിഗ്‌സ്‌ക്രീന്‍ പ്രേക്ഷകര്‍ക്കൊപ്പമോ അല്ലെങ്കില്‍ അവരേക്കാളധികമോ ആണ് കേരളത്തിലെ മിനസ്‌ക്രീന്‍ പ്രേക്ഷകരുടെ എണ്ണം. സിനിമാതാരങ്ങളേക്കാള്‍ സ്വീകാര്യത പലപ്പോഴും സീരിയല്‍ താരങ്ങള്‍ക്ക് ലഭിക്കുന്നതും ഇതിനാലാണ്.
മലയാള സീരിയല്‍ ചരിത്രത്തിലെ ഒരു പുതിയ ഏട്ടിലേക്കാണ് ഇത്തവണത്തെ കേരളപിറവി ദിനം ചുവടുവയ്ക്കുന്നത്.
ആദ്യമായി ഒരു ട്രാന്സ്ജെന്ഡറിന്റെ കഥ പറയുന്ന ഒരു സീരിയല്‍ പ്രേക്ഷകരിലേക്ക് എത്തുകയാണ്. ഒരു ട്രാന്‍സ്മാനിന്റെ കഥ പറയുന്ന ആണ്‍പിറന്നോള്‍ അമൃത ടിവിയിലാണ് സംപ്രേക്ഷണം ആരംഭിക്കുന്നത്.
മലയാളത്തിന്റെ പ്രിയപ്പെട്ട സംവിധായകന്‍ ശിവ മോഹന്‍ തമ്പിയാണ് ഈ പുതിയ ചുവടുവയ്പ്പിന് പുറകില്‍. ഈ സീരിയലിനെക്കുറിച്ചുള്ള തന്റെ പ്രതീക്ഷകളെക്കുറിച്ചു സംവിധായകന്‍ ഒരു സ്വകാര്യ മാധ്യമത്തിന് നല്‍കിയ അഭിമുഖത്തില്‍ പങ്കുവെച്ചിരുന്നു.
‘ഇന്ത്യന്‍ ടെലിവിഷന്‍ ചരിത്രത്തില്‍ തന്നെ ആദ്യമാണ് ഒരു ട്രാന്സ്ജെന്ഡറിന്റെ കഥ സീരിയലാകുന്നത്. ഈ സീരിയല്‍ ഒരിക്കലും ട്രാന്‍സ് കമ്മ്യൂണിറ്റിയെ അപകീര്‍ത്തിപ്പെടുത്തുന്നതല്ല പകരം അവര്‍ കടന്നുപോകുന്ന ജീവിത പ്രശ്നങ്ങളിലേക്ക് വെളിച്ചം വീശുന്ന ഒന്നായിരിയ്ക്കും.
പെണ്ണായി ജനിച്ചു പിന്നീട് താന്‍ തെറ്റായ ശരീരത്തിലാണ് എന്ന് തിരിച്ചറിയുന്ന ഒരാളുടെ കഥയാണിത്. ആ വ്യക്തി ശാരീരികവും മാനസികവുമായി നേരിടുന്ന വെല്ലുവിളികളാണ്
ഈ കഥയുടെ ഇതിവൃത്തം. ഇത് വളരെയേറെ വെല്ലുവിളികളുള്ള ഒരു പ്രൊജക്റ്റ് ആണ് അതിന്റെ എക്‌സൈറ്റ്മെന്റില്‍ ആണ് ഞാന്‍. എന്നാല്‍ അതുപോലെ തന്നെ ഇത്തരം ഒരു കഥ ജനങ്ങള്‍ എങ്ങനെ സ്വീകരിക്കും എന്നൊരു ആശങ്കയും എനിക്കുണ്ട്,’ സംവിധായകന്‍ പറഞ്ഞിരുന്നു.
പുതുമുഖ താരം റിയയാണ് അപൂര്‍വ എന്ന മുഖ്യ കഥാപാത്രം അവതരിപ്പിക്കുക. റിയക്കു പുറമെ പാര്‍വതി, മുകുന്ദന്‍, ദേവി അജിത് എന്നിവരും മുഖ്യ വേഷത്തില്‍ എത്തും. കേരളപിറവി ദിവസമായ നവംബര്‍ ഒന്നിനാണ് സീരിയല്‍ ആരംഭിക്കുന്നത്.
